Бизнесийн төрөл, онцлог, зах зээл ба хэрэглэгчийн хүрээ зэргээс хамаарч маркетингийн стратегийг сонгодог. Хэрэглэгчийг татах, ашгаа нэмэгдүүлэх нь уг стратегийн гол зорилго бөгөөд үүнийг биелүүлэхийн тулд маркетингийн босоо ба хэвтээ гэсэн хоёр тогтолцооны аль нэгийг сонгон хэрэглэнэ. Тухайн чиглэлээр бизнес эрхлэгчийг татах, тэдгээртэй хамтрах замаар босоо маркетингийн тогтолцоо бүрдүүлдэг. Жишээ нь, ус шахагч насос хийдэг үйлдвэр бүтээгдэхүүнээ борлуулах гэрээг бөөний худалдааны компани болон уг шахагчийг угсарч суурилуулдаг компанитай зэрэг хийж борлуулалтаа хурдасгадаг бөгөөд үүний дунд гурван компанийн аль алиных нь ашиг орлого нэмэгдэж байвал босоо маркетингийн тогтолцоо амжилттай үйлчилж байгаа хэрэг юм. Босоо маркетингийн тогтолцоо нь дараах төрлүүдтэй байна.

Үүнд:

Компанийн босоо маркетингийн тогтолцоо гэдэг нь хуваарилалтын сүлжээн дэх аль нэг гишүүн нь үйлдвэрлэл, хуваарилалтын бүх үйл ажиллагааг удирдан явуулж байгаа явдал юм.
Гэрээ хэлцлийн босоо маркетингийн тогтолцоо нь уг тогтолцоо дахь гишүүн бүр бие даан ажиллаж, гэрээ хэлцлийн үндсэн дээр үйл ажиллагаагаа уялдуулдаг apra хэлбэр юм. Энэ нь франчайзын хэлцэлтэй төстэй.
Захиргааны босоо маркетингийн тогтолцоонд уг тогтолцооны аль нэг хүчтэй, томоохон гишүүн нь бусдыгаа удирдан ажилладаг.

Ойролцоо түвшний компаниуд бүтээгдэхүүний үйлдвэрлэл, хуваарилалт, маркетинг болон хүний нөөцөө нэгтгэж, ашиг орлогоо нэмэгдүүлэх арга хэлбэрийг хэвтээ маркетингийн тогтолцоо гэнэ. Ийм тогтолцоонд үйлдвэрлэгч, бөөний худалдаа, жижиглэнгийн худалдааны компаниуд нэгдэж болно.