Эдийн засгийн үзэгдлүүдийг судлахдаа хийсвэрлэлийн аргыг өргөн хэрэглэнэ. Энэ арга нь эдийн засгийн ухааны танин мэдэхүйн гол зэвсэг юм. Хийсвэрлэх арга нь юмс үзэгдлийн гол чухал зүйлсийг гол бус хүчин зүйлсээс хийсвэрээр ялган авч, уг үзэгдлийн шинж чанар, холбоо, хамаарлыг судлан шинжлэх замаар танин мэдэх гол арга мөн.

Байгалийн шинжлэх ухаанд, тухайлбал, химийн шинжлэх ухаанд судлах зүйлээ дуран авай гэх мэтийн тодорхой багажийн тусламжтайгаар тусгай лабораторид судалдаг. Тэгвэл эдийн засгийн судалгаанд дуран авай шиг багаж хэрэглэх боломжгүй тул хийсвэрлэлийн арга гол үүрэг гүйцэтгэнэ. Хийсвэрлэх замаар эдийн засгийн тодорхой тогтолцоог санаагаараа загварчлан таамаглаж, түүний мөн чанар, дотоод уялдаа холбоог нээн илрүүлэх боломжтой. Жишээлбэл, "бусад хүчин зүйлс тогтмол байх үед" гэсэн хийсвэрлэлийг эдийн засгийн судалгаанд өргөн хэрэглэдэг. Эдийн засгийн тухайн асуудалд нөлөөлдөг олон хүчин зүйлсээс хамгийн гол хүчин зүйлийг ялган авч, бусдыг нь тогтмол гэж хийсвэрлэн авч үзнэ. Ийнхүү тухайн гол хүчин зүйл нь үр дүнд хэрхэн нөлөөлж буй зүй тогтлыг илрүүлнэ.