Хүмүүс олон төрлийн бараа, үйлчилгээ хэрэглэдэг бөгөөд тэр бүрээс адилхан ахиуц ханамж авахыг хүсдэг. Хэрэв олон төрлийн бараанаас нэг бараа надад илүү их ахиуц ханамж өгч байвал би бусад бараа авах мөнгөнөөс илүүчлэн уг барааг нэмж авч ахиуц ханамжаа нэмэгдүүлнэ. Тэгэхдээ ахиуц ханамж буурах хууль үйлчилж, ахиуц ханамж буурах хүртэл тухайн барааг нэмж авна. Хэрэв аль нэг бараа бага ахиуц ханамж өгч байвал уг бараанаас авах тоог цөөрүүлнэ. Тэгэхдээ сүүлийн доллароо зарж авахад уг барааны өгөх ахиуц ханамж хэвийн хэмжээнд хүртэл буурна.

Тэнцвэрийн үед бүх барааг худалдан авахад доллар бүрд ногдох нийт ахиуц ханамжийг орлогын ахиуц ханамж гэнэ. Энэ бүхнээс үзэхэд зах зээлийн тухайн үнийн түвшинд тодорхой хэмжээний орлоготой хэрэглэгч хамгийн их ханамж авч чадаж байвал тэр нь ханамжийн тэнцвэрт нөхцөлийг бий болгоно. Өөрөөр хэлбэл, бараа бүрд зарцуулсан сүүлийн доллар бүрийн ахиуц ханамж нь бусад аль ч барааг авахад зарцуулсан сүүлчийн доллар бүрийн ахиуц ханамжтай яг адил байх нөхцөлд хүн хамгийн их ханамж авна.