Дэлхийн эдийн засаг даяаршихын хамт улс орнуудын эдийн засгийн харилцан хамаарал, харилцан үйлчлэл улам гүнзгийрч, зарим тохиолдолд эдийн засгийн бодлогыг уялдуулах шаардлага тулгарч байна.

Тухайлбал, Үнэ ба цалин уян хатан биш байгаагаас үүдэн зах зээлийн өөрийгөө зохицуулах механизм алдагдаж, бизнесийн мөчлөг давтагдаж, ажилгүйдэл, инфляц ээлжлэн солигддог.  Мөн нэг улс дахь ажилгүйдэл, инфляц бусад улсдаа нөлөөлж байгаа нь улс орнууд макро эдийн засгийн бодлогоо уялдуулах шаардлага тулгарч байгааг харуулж байна.  Зарим улс олон улсын санхүүгийн зах зээл дээр итгэл алдсанаас болж хөрөнгө оруулагчид зайлсхийх нь элбэг тохиолддог. Мөн зарим улсын валютын ханшны тэнцвэр алдагдсанаас багагүй хүндрэл учирдаг.  

Энэ мэт асуудал үүсэхэд хөгжингүй улс орнууд зээл тусламж үзүүлэх, эдийн засгаа нээлттэй болгоход нь туслах шаардлага үүсдэг байна. Зарим улс импортын гаалийн тарифыг өндөр тогтоосноор бусад улсын эдийн засгийн өсөлтөд саад учруулдаг. Гэтэл зарим улс илүүдэл бараагаа бусад улсад хэт хямдаар нийлүүлж, үйлдвэрлэлд нь муугаар нөлөөлдөг. Иймд улс орнууд бие биенхээ эдийн засагт хохирол учруулахгүй, харилцан ашигтай байхын тулд худалдаа, хөрөнгө оруулалтын бодлого, дүрэм журмаа хоорондоо уялдуулж, зохицуулах шаардлагатай.