ДНБ-ийг хэмжих хэд хэдэн үндсэн арга бий. Үүний нэг нь хэрэглэсэн бараа, үйлчилгээний нийлбэрээр хэмжих, нөгөө нь цалин ба зардлын нийлбэрээр хэмжих арга юм.

1. Бараа, бүтээгдэхүүний хэрэглээгээр тооцох арга (flow-of-product approach). Хүмүүс, айл өрх жилд олон төрлийн бараа, үйлчилгээ хэрэглэдэг бөгөөд эдгээр бүх эцсийн хэрэглээний бараа, үйлчилгээ тус бүрийг зах зээлийн үнээр үржүүлж, тэдгээрийн нийлбэрээр ДНБ-ний хэмжээг тодорхойлно. Зах зээлийн үнэ нь тухайн бараа, үйлчилгээний эдийн засгийн өртөг зардал болоод хэрэглэгчийн ханамжийг бодитой илэрхийлдэг учир уг үнийг ДНБ- ийг тодорхойлоход ашигладаг байна. Монгол Улсын статистикт уг аргыг эцсийн ашиглалтын арга гэж нэрлэжээ.
2. Цалин ба зардлаар хэмжих арга (earning or cost approach). Бизнес эрхлэхэд гарсан нийт зардлыг нэмэх замаар ДНБ-ий хэмжээг тодорхойлж болно. Жишээ нь, бизнес эрхлэхэд ашигласан газрын төлөө рент, капиталын төлөө ашиг, хөдөлмөрийн төлөө цалин төлдөг билээ. Эдгээр бүх зардлын нийлбэрийг тооцох замаар ДНБ-ийг тодорхойлно. Монгол Улсын статистикт уг аргыг хуваарилалтын арга гэж нэрлэжээ. Энэ хоёр аргын алинаар нь ч бодсон ДНБ-ий хэмжээ ижил гарна.