Мэдээллийн технологи, инженерчлэл, автоматжуулалт, инновацын хөгжилд суурилсан орчин үеийн эдийн засгийг мэдээллийн эдийн засаг гэнэ. Мэдээллийн эдийн засаг нь дараах үе шатыг дамжин хөгждөг.

Үүнд:

• Үйлдвэрлэлд мэдээллийн технологи нэвтэрч эхлэх;
• Мэдээллийн технологи өргөн хүрээгээр нэвтэрч, стандартчилагдсан систем давамгайлах;
• Мэдээлэл үйлдвэрлэл ба мэдээллийн технологийн салбарт бүтээмж дээшлэх;
• Мэдээлэл ба мэдлэгийн үйлдвэрлэл давамгайлах.

Мэдээллийн эдийн засгийн систем нь харилцан нэг утгатай байх, тасралтгүй байх, хариу үйлдэл хийх гэсэн функцууд дээр үндэслэгдсэн аж ахуйн үйл ажиллагааны систем юм. Үүний жишээ бол Visa card, Master card, Интернэт худалдаа зэрэг юм. Уг систем нь интернэт зэрэг теле мэдээллийн сүлжээнд тулгуурлаж байна. Мэдээллийн эдийн засгийн систем нь:

• Бүрдүүлж буй элементүүдийн онцлогоор;
• Тэдгээрийн тоогоор;
• Бүтцээр, өөрөөр хэлбэл, элементүүдийг нэгтгэж буй холбоосын шинжээр илэрхийлэгдэнэ.

Элемент гэдэг нь аж ахуйн үйл ажиллагааны субъекттэй холбоотой, түүний тодорхой шинжийг илэрхийлж буй цахим нэгж юм. Мэдээллийн эдийн засгийн систем нь бодит эдийн засгийн системтэй харилцан уялдаатай бөгөөд түүний баримт, үйл явцыг тодорхой бүтцийн дагуу илэрхийлнэ.