Энэ нь хүүгийн орлого оруулдаг актив, мөн хүүгийн зарлага гаргадаг пассивын үргэлжлэх хугацаа, хүүгийн өөрчлөлтөд хэр зэрэг мэдрэг байгааг харуулдаг эрсдэлийг хэмжих арга юм. Бондын үнийн мэдрэмж нь хүүгийн хэмжээг өөрчлөх ба бондын хүүгийн хэмжээний эрсдэлийн хэмжигдэхүүн болж байдаг. Бондын хүүгийн хэмжээний эрсдэлд:

1. бондын хүчин төгөлдөр байх хугацааны бүх өгөөж;
2. бондын хүчин төгөлдөр байх хугацаа;
3. бондын хүүгийн хэмжээ зэрэг хүчин зүйлс нөлөөлнө.

Эдгээр гурван хүчин зүйлийн нэгдэл нь бондын жинлэсэн дундаж хугацаагаар тодорхойлогдоно. Хөрөнгө оруулагч нар жинлэсэн дундаж хугацааг тооцох ач холбогдлыг өндөрт тавьдаг. Жинлэсэн дундаж хугацаа нь бондын үндсэн ба хүүгийн төлбөр төлөгдөж дуусах хугацаа юм. Жинлэсэн дундаж хугацаа нь дараах онцлогтой. Үүнд:

1. Хүүгүй бондын жинлэсэн дундаж хугацаа нь бондын хугацаатай тэнцүү байна.
2. Бондын хүү буюу купон өндөр байх тусам жинлэсэн дундаж хугацаа богино байна.
3. Бондын өгөөж өндөр байх тусам жинлэсэн дундаж хугацаа богино байна.