Хомсдол ба үр ашиг бол эдийн засгийн ухааны хос ойлголт юм. Хүний хэрэгцээт бараа, эд зүйлс хомс, хязгаарлагдмал тоотой байдаг. Иймд тэр хязгаарлагдмал нөөцийг үр ашигтай зарцуулж байж хүн хэрэгцээгээ ямар нэг хэмжээгээр хангаж чадна. Хүмүүсийн хүсэл, хэрэгцээ нь түүнийг хангаж чадахуйц нөөцөөс давсан нөхцөл байдлыг хомсдол гэнэ. Ийм нөхцөлд хүн хангаж болох хүсэл, хэрэгцээ ба хангаж болохгүй хүсэл, хэрэгцээ хоёрын хооронд сонголт хийх шаардлагатай тулгарна. Хэрэв эд бараа хязгааргүй их, ямар ч хомсдолгүй байсан бол хүмүүс цалин орлогоо хуваарилах гэж зовохгүй, аж ахуйн нэгж зардлаа хямдруулах гэж хичээхгүй, төр засаг татвар цуглуулж, төсвөөр дахин хуваарилах гэж ажиллахгүй байх байсан, тэгэхээр эдийн засгийн ухаан ч хэрэггүй байх байсан. Гэтэл бодит байдал дээр хүний хэрэгцээт бараа ямагт хязгаарлагдмал, хомс байдаг.