Тухайн улсад түүхийн явцад бүрэлдэн тогтож, хууль тогтоомжоор баталгаажсан мөнгөн гүйлгээний бүтцийг мөнгөний систем гэнэ. Мөнгөний системийг металл мөнгөний гүйлгээний систем, тэмдэгтийн гүйлгээний МӨНГӨН Систем гэж ангилна. Металл мөнгөний гүйлгээний системийг хос металл ба нэг металл мөнгөнийх гэж бас ялгана. Алт ба мөнгөний аль алиныг нь түгээмэл эквивалент гэж үзэж байсан системийг хос металл мөнгөний систем гэнэ.

Харин нэг металл мөнгөний системд алт, мөнгө, зэс гурвын аль нэг нь түгээмэл эквивалентийн үүрэг гүйцэтгэж байжээ. Яваандаа алт түгээмэл эквивалентийн үүрэг гүйцэтгэх нь голлох болсон. Алтан мөнгөний системийг дотор нь алтан монетийн, алтан ембүүт, алтаар солигдох стандартын гэж ялгана.

Дэлхийн I дайны дараа алтан монетийн оронд алтан ембүүт болон алт, валютын систем тогтжээ. Харин 1929-1933 Оны хямралын дараа алтан нэг металлын систем үгүй болж, 1944 оноос Бреттон Вудсын мөнгөний систем бий болсон юм. Үүнд алт нь мөнгөн гүйлгээнээс хасагдаж, оронд нь АНУ-ын доллар, Их Британийн паунд олон улсын мөнгөний үүрэг гүйцэтгэх болж, тэдгээрийг алтаар солих боломжтой болсон.

1976 онд Ямайкийн мөнгөний систем бий болж, зээлжих тусгай эрх (Special Drawing Rights, SDR) хэмээх нэгжийг дэлхийн мөнгөний нэгж болгон баталгаажуулжээ. SDR нь дэлхийн 5 валютын сангаас бүрдэх бөгөөд үүнд АНУ-ын доллар 41.73%, евро 30.93%, Хятадын юань 10.92%, Японы иен 8.33%, Британийн паунд 8.09%-ийн жинтэй байна.