1944 оны 7-р сард АНУ-ын Нью-Хэмпшир муж улсын Бреттон Вудс хотод болсон НҮБ-ийн мөнгө, санхүү, эдийн засгийн олон улсын бага хурлаар Олон улсын валютын сан (ОУВС)-г байгуулсан ба гол зорилго нь улс орны валютын ханшийг тогтворжуулах, дэлхийн төлбөр тооцооны системийг бүрдүүлэх явдал байв. 189 гишүүн орноос бүрддэг тус сан гишүүн орнуудынхаа макро эдийн засгийн бодлогыг хянах, ялангуяа валютын ханш тогтворгүй, төлбөрийн тэнцэл алдагдалтай улсуудын эдийн засгийг тогтворжуулахад туслах замаар олон улсын санхүүгийн тогтол- цоог зохицуулах үүрэг гүйцэтгэж байна.

Монгол Улс 1991 онд ОУВС-д гишүүнээр элссэн бөгөөд тус сантай хамтран төсөл, хөтөлбөр хэрэгжүүлж ирсэн. Тухайлбал, 2017 оноос 3 жилийн хугацаатай өргөтгөсөн санхүүжилтийн хэлэлцээр байгуулж, энэ хугацаанд тус сангаас 440 сая ам.долларын тусламж, сангийн гишүүн орнуудаас 5.5 тэрбум ам.долларын хөнгөлөлттэй зээл авах болсон. ОУВС-гийн гишүүн орон бүр санд өөрийн хувиа оруулдаг бөгөөд олон улсын тооцооны нэгжээр илэрхийлэгдэх зээлийн зохицуулалтын эрх, квоттой байх ба АНУ нийт хөрөнгийн 17.7%, Герман ба Япон 5.5%, Европын холбооны улс орнууд 26-аас илүү хувь, ОХУ 2.9%-ийг эзэлдэг байна.