Энгийн утгаар нь хэлбэл тухайн хүн, айл өрхийн орлого бага учир хоол, унд, хувцас хунар, орон байрны зардалд мөнгө хөрөнгө нь хүрэлцэхгүй дөнгөн данган амь зуухыг ядуурал гэнэ. Ядуурлын гол шинж нь орлогын дутагдал юм. Гэвч ядуурал нь зөвхөн орлоготой холбоотой биш, бас хүний өөрийн чадавх, нөөц бололцоо, ур чадвар, амьдралыг үзэх үзэл, сэтгэхүй зэрэг шалтгаантай.

Хүний амьжиргааны доод түвшнийг тогтоон, хүн амын хэчнээн хувь уг түвшнээс доош орлоготой байна гэдгээр ядуурлыг тодорхойлдог. Эрдэмтэд ядуурлын талаар 5 үндсэн үзэл, онолыг гаргажээ.

1. Марксист онол ядуурал нь хувийн өмчид суурилсан нийгмийн байгуулалтай холбоотой учир түүнийг даван туулахын тулд нийгэм журмын тогтолцоогоор солих хэрэгтэй гэж үздэг.
2. Ядуурал нь хувь хүнээс шалтгаалдаг учир дэмжлэг, тусламж хэрэггүй, зөнд нь орхи гэсэн онол бий.
3. Тавилангийн онол нь ядуурал байгалиас заяасан мөнхийн үзэгдэл гэж тайлбарладаг. 
4. Мальтусын онол хүн амын өсөлтийн хурд нь үйлдвэрлэж буй хүнсний бүтээгдэхүүнээс үргэлж түрүүлж байдаг учир ядуурал үүсдэг гэж үздэг.
5. Үйл ажиллагааны онол нь нийгэмд ядуус байдаг бөгөөд энэ нь нийгмийг хөгжүүлэх хүчин зүйл болдог хэмээн тайлбарладаг.