Санхүүгийн тогтвортой байдал гэх ойлголт нь өргөн хүрээг хамардаг бөгөөд Олон улсын валютын сан болон улс орнуудын хувьд тэдгээрийн эдийн засгийн нөхцөл байдал, олон улсын орчин, банк санхүүгийн зах зээл, үнэт цаасны зах зээл болон бусад салбаруудыг төлөөлүүлэн авч үздэг байна. Аливаа улс орны санхүүгийн зах зээлийн тогтвортой байдал нь тухайн улс орны хөгжлийн гол үзүүлэлтүүдийн нэг байдаг. Улс орон болгон өөрийн онцлогоос хамааралтайгаар санхүүгийн тогтвортой байдлыг авч үздэг. Монгол Улсын хувьд санхүүгийн тогтвортой байдалд дотоод эдийн засгийн орчин, олон улсын эдийн засаг үнийн орчин, хөрш орнуудын эдийн засгийн төлөв байдал, санхүүгийн салбарын төлөвшил зэрэг хүчин зүйлс голлон нөлөөлдөг.

Санхүүгийн тогтвортой байдлын үзүүлэлтүүд нь:

1) Өөрийн хөрөнгийн хүрэлцээ;

2) Хөрөнгийн чанар;

3) Ашигт ажиллагаа;

4) Хөрвөх чадвар;

5) Зах зээлийн эрсдэлийн мэдрэмж гэсэн үндсэн 5 бүлгээс бүрдэх бөгөөд нийт 12 үндсэн үзүүлэлтээр тооцоолдог.

Мөн Түүнчлэн мета-өгөгдлүүд болон нэмэлт үзүүлэлтүүдийг харгалзан авч үздэг.