Төв банк нь арилжааны банкнуудад мөнгө зээлдүүлдэг бөгөөд төв банкны энэ зээлийн хүүг хөнгөлөлттэй (хямдруулсан) хүү гэнэ. Хэрэв гүйлгээн дэх мөнгөний нийлүүлэлтийг багасгах шаардлагатай бол төв банк зээлийн хүүгийнхээ хувийг өсгөнө. Ингэсэн нөхцөлд арилжааны банкнууд төв банкнаас мөнгө зээлэхээ больж, үүний улмаас иргэд, аж ахуйн нэгжүүдэд олгох зээл багасаж, мөнгөний нийлүүлэлт буурна. Хэрэв хөрөнгө оруулалт багасаж, ажилгүйдэл ихсэж мөнгөний нийт нийлүүлэлтийг ихэсгэх шаардлагатай бол төв банк зээлийн хүүгийнхээ хувийг багасгана. Үүний хамт арилжааны банкнууд төв банкнаас зээл авах нь нэмэгдэж, улмаар авсан зээлээ хүмүүс, аж ахуйн нэгжүүдэд зээлдүүлэх, үнэт цаас худалдан авах зэргээр хөрөнгө оруулалтыг нэмэгдүүлэхэд нөлөөлнө. Монгол банкны зээлийн хүүг бодлогын хүү гэж нэрлэдэг.