Хөлсөөр ажиллаж буй ажилтны хөдөлмөрийн хөлсийг тодорхойлох аргыг хөдөлмөрийн хөлсний систем гэнэ. Энэ нь дөрвөн үндсэн ангилалд хуваагдана.

Нэгдүгээрт, хөдөлмөрийн хөлсийг ажилласан цагийг үндэслэн тогтооно. Үүнийг цагаар олгох хөдөлмөрийн хөлсний систем гэдэг.

Хоёрдугаарт, хувь хүний ажлын үр дүнг үндэслэн хөлс олгож болно. Хэрэв ажлын үр дүн нь үйлдвэрлэх бүтээгдэхүүний тоо хэмжээгээр хэмжигдэхээр бол түүнд төлөх хөлсийг хийснээр олгох (piece rates), харин борлуулалтын өртгөөр илэрхийлэгдэх бол түүнд олгох хөлсний хэлбэрийг нөөцөөр төлөх (royalties) гэж нэрлэнэ.

Гуравдугаарт, хөдөлмөрийн хөлс нь хэсэг бүлэг хүний ажлын хамтын үр дүнд үндэслэгдэн олгогдож болох бөгөөд энэ тохиолдолд тэдний зүгээс ашигт оруулсан хувь нэмрийг харгалзан хөлс олгоно.

Дөрөвдүгээрт, хөдөлмөрийн хөлсний өрсөлдөөнт нөхцөл дэх ажлын харьцангуй үр дүнг үндэслэн хөлс олгоно.