Зах зээлийн эдийн засаг гэдэг нь бараа, үйлчилгээний үнэ эрэлт, нийлүүлэлтийн харьцаагаар чөлөөтэй тодорхойлогддог эдийн засаг юм. Энэ нь төвлөрсөн төлөвлөгөөт эдийн засгийн эсрэг тогтолцоо юм. Зах зээлийн эдийн засаг нь дараах онцлогтой. Үүнд:

1. Хувийн, төрийн, хувь нийлүүлсэн өмчийн аль аль хэлбэр нь байж болно. Хувийн өмч давамгай байр суурь эзэлдэг.
2. Улсын түвшинд стратегийн томоохон зорилт, тодорхой хөтөлбөрийг боловсруулж, түүнийг хувийн болон улсын аж ахуйн нэгжээр захиалга өгч гүйцэтгүүлдэг.
3. Эдийн засгийн бодлогыг сангийн ба мөнгөний бодлого, зах зээлийн эдийн засгийн хуулийн дагуу хэрэгжүүлдэг.
4. Зах зээлийн нөхцөлд тохирсон нийгмийн хамгааллын бодлого, арга хэмжээг төрөөс авч хэрэгжүүлдэг. Хүн өөрөө өөрийнхөө эрүүл мэнд, боловсрол, нийгмийн асуудалд илүү анхаарах шаардлагатай болно.
5. Банкны систем хоёр шатлалтай болж, төв ба арилжааны банкнууд ажиллана.
6. Бүтээгдэхүүний үнэ бүрдэлт, хэрэглээний зүйлсийн үнэ зах зээлийн эрэлт, нийлүүлэлтийн хуулиар тогтоогдоно.
7. Хувь хүн, бизнесийн байгууллага нь эдийн засгийн эрх чөлөөтэй, хуулийн хүрээнд ашиг олох зорилгоор үйл ажиллагаагаа явуулдаг.