Компаниуд бизнес хийхдээ ашиг орлогоо нэмэгдүүлэхийн хамт нийгэм болон байгаль орчинд ээлтэй, нэмэр тустай ажиллах шаардлагыг бизнесийн нийгмийн үүрэг хариуцлага гэнэ. Компаниуд нийгмийн үүрэг хариуцлагаа хоёр янзаар хэрэгжүүлдэг.

Үүнд:

1. Нийгмийн сайн сайхны төлөө үйлсэд хандив өргөх, үйл ажиллагааны болон эд материалын туслалцаа үзүүлэх,
2. Байгаль орчны бохирдлыг багасгах технологи нэвтрүүлэх, хүлэмжийн хий ялгаруулах үйлдвэрлэлийг багасгах, эсвэл зогсоох зэрэг арга хэмжээ авч байна.

Гэхдээ зарим эдийн засагч "нийгмийн үүрэг хариуцлага гэдэг нь бизнесийн мөн чанар буюу ашиг олох зорилготой харшилдана" хэмээн шүүмжилдэг. Тогтвортой хөгжлийн асуудал нэн чухлаар тавигдаж буй өнөөгийн нөхцөлд бизнесийн нийгмийн үүрэг хариуцлага зайлшгүй шаардагдах болж байна. Энэ нь нэг талаас төрийн хяналт, шаардлага, нөгөө талаас компанийн ёс зүйн хэм хэмжээ сайн дурын үндсэн дээр хэрэгжих учиртай.