Аливаа байгууллагад ёс зүйн хэм хэмжээг сахиулах, төлөвшүүлэхэд түүний удирдлага гол үүрэг гүйцэтгэнэ. Ажиллагчийнхаа сэтгэл санааг судлах, хүсэл тэмүүллийг нь мэдэх, тэдэнд туслах, сайн санал, сэдлийг нь дэмжих, байгуулллагын маргаантай асуудлыг шийдвэрлэхэд тэднийг оролцуулах зэрэг замаар байгууллагын ёс зүйг удирддаг. Ёс зүйн удирдлага нь:

1. ёс зүйн системийг бүрдүүлэх;
2. ёс зүйтэй манлайлах;
3. ёс зүйтэй ажиллагчийг төлөвшүүлэх гэсэн үндсэн хэсгүүдээс бүрдэнэ.

Байгууллагын ёс зүйн дүрмийг боловсруулах, ёс зүйн сургалт явуулах, ёс зүйн хороо байгуулах зэргээр ёс зүйн системийг бүрдүүлнэ. Ёс зүйн удирдлагад удирдагч хүний манлайлал, хувийн үлгэр жишээ чухал үүрэгтэй. Удирдагч хүмүүс ажиллагч нартайгаа ёс зүйтэй зөв харилцаж, ёс зүйн хэм хэмжээг мөрдөх талаар өөрөө үлгэр жишээ үзүүлэх ёстой. Ажиллагч нар байгууллагын ёс зүйн дүрмийг ягштал биелүүлж, хоорондоо соёлтой зөв харилцаж хэвшсэн байх хэрэгтэй.