Ерѳнхий утгаар авч үзвэл, тодорхой төрлийг үйл ажиллагааг гүйцэтгэж чадах чадварыг нь илэрхийлсэн хүний шинж чанарын цогц юм. Үүнээс гадна улс орон, бүс нутаг, аймаг, сум, байгууллагын түвшинд энэ ойлголтод зохих мэдлэг, чадвар бүхий бэлэн байгаа хөдөлмөрийн нөөцийг хамруулна. Хүний нөөц нь нийгмийн хувьд ч, тухайн байгууллагын хувьд хөгжлийн үнэ цэнэтэй капитал юм.

Иймд хүний нөөцийн менежмент нь хүний нөөцийг бүрдүүлэх, ажлын байраар хангах, бэлтгэх, Мэргэжил дээшлүүлэх, тогтвор суурьшилтай, үр бүтээлтэй ажиллах нөхцөлөөр хангах, өөрийгөө хөгжүүлэх боломж олгоход чиглэгдэнэ. Байгууллагын хүний нөөцийг үр ашигтай ашиглахад цалин хөлсний болон урамшууллын систем чиглэгдэнэ.

Хүний нөөцийн менежмент:Менежментийн шинжлэх ухааны бүрэлдэхүүн хэсэг бөгөөд менежерүүдийн ажлыг идэвхжүүлэх замаар ажиллагчийн ажлын үр дүнг сайжруулах гэсэн утгаар тайлбарладаг. Хүний нөөцийн менежментийн зорилго нь ажлын байранд тохирох чадвартай, бас сонирхолтой ажилтныг сонгож авах, тэднийг тогтвор суурьшилтай, үр дүнтэй ажиллуулах, мэргэжлийн бэлтгэл, ур чадварыг нь тасралтгүй дээшлүүлэхэд оршино.

Үнэндээ хүн сэтгэх чадвар бүхий үйлдвэрлэлийн онцлог хүчин зүйлийн хувьд орлого олох, хөдөлмөрийн бүтээмжийг дээшлүүлэх гол хөдөлгөгч хүч мөн. Иймд байгууллагын хүний нөөцийн менежментийн бодлогын хүрээнд хөдөлмөрийн зах зээлийг судлах, ажилтныг сонгон шалгаруулах, мэргэжлийг нь дээшлүүлэх, цалин хөлс, урамшууллын оновчтой системийг хэрэгжүүлэх, хөдөлмөрийн нөхцөлийг сайжруулах, үр бүтээлтэй ажиллах уур амьсгал бүрдүүлэх зэрэг бүх асуудлыг төлөвлөх, зохион байгуулах, зохицуулах, хяналт тавих нь тухайн байгууллагын хүний нөөцийн менежерийн гол үүрэг байна.