Аж ахуйн нэгжийн үйл ажиллагааг үр ашигтай явуулахад шаардлагатай хөрөнгийг мөнгөн хэлбэрээр хуримтлуулсан дүнг мөнгөн капитал гэнэ. Энэ нь аж ахуйн нэгж үүсэж ажиллах гол үндэс бөгөөд цаашдын үйл ажиллагааны нөхцөл болно. Аж ахуйн нэгжийн нийт капиталыг бодит капитал, мөнгөн буюу санхүүгийн капитал гэж ялгана. Бодит капиталд материаллаг ба материаллаг бус хэлбэрээр байгаа нийт объектуудыг хамааруулна. Мөнгөн капитал буюу санхүүгийн капиталд бэлэн мөнгө, банкны данс дахь мөнгөн хөрөнгө, даатгалын ба тэтгэврийн хуримтлалын зарим хэсэг багтана. Мөнгөн капиталыг өөрийн хөрөнгө, зээлийн хөрөнгө гэж зааглана. Аж ахуйн нэгжийг байгуулах үед дүрмийн сан байгуулдаг бөгөөд энэ нь өөрийн хөрөнгө юм. Урт ба богино хугацаатай зээл, облигац борлуулсны орлого зэрэг нь зээлийн хөрөнгийг бүрдүүлнэ.

Санхүүжилтийн эх үүсвэрээр нь мөнгө капиталыг дотоод ба гадаад эх үүсвэртэй гэж ялгана. Аж ахуйн нэгжийн дүрмийн сан, нөөц капитал, хуваарилагдаагүй ашиг зэрэг нь мөнгөн капиталын дотоод эх үүсвэр юм. Хөрөнгө оруулалт, даатгалын төлбөр, зээлийн хөрөнгө зэрэг нь мөнгөн капиталын гадаад эх үүсвэр болно. Мөнгөн капиталыг дараах зорилгоор ашиглана. Үүнд:

• Аж ахуйн үйл ажиллагааг хөтлөн явуулах;
• Санхүүгийн үүргээ биелүүлэх;
• Нөөц сан бүрдүүлэх;
• Бодит хөрөнгийг нөхөх зэрэг болно.