Зах зээлийн өрсөлдөөн нь хязгаарлагдмал нөөцийг үр ашигтай ашиглах нөхцөлийг бүрдүүлж, хувийн ашиг сонирхлыг хязгаарлан нийгмийн зайлшгүй хэрэгцээт барааг үйлдвэрлэх бололцоог бий болгодог. Өрсөлдөөн нь зах зээлийн эдийн засгийн үндсэн тохируулагч, хянагч хүч болдог. Зах зээлийн өрсөлдөөн нь нэг талаас өндөр үр дүнд хүрэхийн төлөө эдийн засгийн өрсөлдөөн, аж ахуйг эрхлэн явуулах аятай, сайн нөхцөл, нөгөө талаас бүтээгдэхүүний үйлдвэрлэл, борлуулалт, хөрөнгө оруулалтын хүрээн дэх зах зээлд оролцогч этгээдийн харилцан уялдаа холбоо, үйлчлэлийг хангадаг зах зээлийн механизмын элемент юм. Эдийн засагч нар зах зээлийн өрсөлдөөний хэв шинжийг төгс өрсөлдөөний зах зээл, монопол өрсөлдөөний зах зээл, олигопол буюу цөөнхийн зах зээл, төгс монопол зах зээл хэмээн ангилдаг.