Зах зээл гэж бараа, үйлчилгээг худалдагч ба худалдан авагчдыг нэгтгэн холбодог эдийн засгийн харилцааны нийлбэр цогц юм. Бүтээгдэхүүний эрэлт, нийлүүлэлтийн харилцан үйлчлэл, үйлдвэрлэгч, хэрэглэгчдийн эдийн засгийн эрх чөлөөнд тулгуурласан үйлдвэрлэл, хэрэглээний аргын сонголтыг зах зээл гэж ойлгож болно. Өөрөөр хэлбэл, хязгаарлагдмал нөөцийг яаж хуваарилан, үйлдвэрлэлээ ямар аргаар явуулж, үр дүнгийн нь хэнд хэчнээн хэмжээгээр хүртээх вэ гэдэг асуудлыг зах зээл зохицуулж шийдвэр гаргадаг. Зах зээлийг дотор нь өргөн хэрэглээний бүтээгдэхүүний ба хүчин зүйлийн гэж хоёр төрөлд хуваан авч үздэг. Бүтээгдэхүүний зах зээлд хоол, хүнс, хувцас хунар, ахуйн үйлчилгээ зэрэг хувийн хэрэглээний бүтээгдэхүүн, үйлчилгээ хамаарагдана. Хүчин зүйлийн зах зээлд үйлдвэрлэл явуулахад шаардлагатай газар, капитал, хөдөлмөр зэрэг үйлдвэрлэлийн нөөцүүд багтана. Зах зээл дээр худалдах, худалдан авах үйлдэл байнга явагдах ба энэ нь зах, бирж, дуудлагын худалдаа, үзэсгэлэн худалдаа гэх мэт төрөл бүрийн хэлбэрээр явагддаг.