Хүмүүс шийдвэр гаргахдаа логик болон хувийн шинжтэй хэд хэдэн хүчин зүйлст тулгуурласан өөрийн сонголтыг хийдэг. Шийдвэр гаргахад тодорхой шалгууруудыг ашигладаг боловч тэдгээрт нөлөөлөх хүчин зүйлсийг сайтар нягтлан судлах шаардлагатай байдаг. Шийдвэр гаргалтад нөлөөлөх дараах нийтлэг хүчин зүйлс байна:

Үнэ цэний хүчин зүйлс. Хөрөнгө оруулалтын өгөөжийг тодорхойлохын тулд зардлыг үр дүнтэй нь харьцуулж үнэлэх замаар шийдвэр гаргана. Энд цаг хугацаа улиран өнгөрөх тусам өртөг зардалд ч, үр өгөөжид ч нөлөөлөх тул ирээдүйд олох ашиг орлогыг зайлшгүй харгалзах ёстой юм. Иймд үнэ, цаг хугацаа, хүчин чармайлт, стресс, алдагдал, алдагдсан боломжийн өртөг зэрэг зардлын хүчин зүйлсийг хамруулан шийдвэр гаргана. Шийдвэр гаргалтад өгөөж талаас мөнгө, цаг хугацаа, хүчин чармайлт, стресс, чадавх, хувийн ба бүлгийн ашиг сонирхол зэргийг харгалзана.

Хувийн хүчин зүйлс. Зардал ба өгөөжийг нь янз бүрийн хүмүүс харилцан адилгүй үнэлдэг. Ялангуяа эд юмсыг хүмүүс субьектив байдлаар үнэлдэг. Энэ нь хувь хүний үнэлэмжтэй холбоотой бөгөөд өөрийгөө бусадтай харьцуулах, эрмэлзэл, хичээл зүтгэл, эрсдэлд хандах хандлага, сэтгэл хөдлөл зэрэг хүчин зүйлс шийдвэр гаргалтад нөлөөлнө.