Хөрөнгө оруулалтын зорилт, эрсдэл, өгөөжийг өөрчлөх, актив, пассивын бүтцээ өөрчлөхийн тулд ямар нэг актив, өр, төлбөр, мөнгөн хөрөнгийн урсгал зэргийг урьдчилж тохиролцсон хүү болон үнээр тодорхой хугацааны эцэст буцаж солигдох нөхцөлтэйгөөр өнөөдөр солилцох санхүүгийн хэлцэл юм. Своп хэлцэл гэдэг нь хүү, хураамжтай, нэг төрлийн зээл юм. Зах зээл дээрээс өндөр хүүтэй мөнгө босгохын оронд гэрээ, хэлцлээр нөхцөлөө тохироод, харьцангуй бага хүүтэй хөрөнгө татахыг своп хэлцэл гэж нэрлэдэг.

Свопыг валютын; зээлийн хүүгийн; хувьцааны; үнэт металлын; үндсэн түвшний; инфляцын; барааны болон дэд эрсдэлийн гэж ангилна. Гэрээний нөхцөл сайжруулах, ашиг олох эрсдэл бууруулах боломж олгоно. Своп нь:

1. анхны солилцоо (арилжаа I);
2. буцах солилцоо буюу свопыг хаах (арилжаа II) гэсэн хоёр хэсгээс бүрддэг.

Своп хэлцэл гэж тухайн өдрийн ханшаар валют худалдан авч (худалдаж), ирээдүйн тохиролцсон ханшаар эргүүлээд худалдах (худалдан авах) арилжааны хоёр хэлцлийг хэлнэ. Жишээ нь, өнөөдөр 1 сая америк долларыг худалдаад 1 сарын дараа эргүүлэн худалдан авах хэлцэл байгуулж болно.