Дэлхий нийтийг хамарсан банк хоорондын санхүүгийн харилцаа холбооны нийгэмлэг (Society for Worldwide Interbank Financial Telecommunication) гэсэн үгний товчлол юм. Дэлхий даяар санхүүгийн байгууллага хооронд төлбөр болон санхүүгийн мэдээ солилцоог гүйцэтгэдэг сүлжээг ажиллуулдаг банкнуудын үүсгэн байгуулсан, хамтын хувь эзэмшлийн байгууллага юм. СВИФТ төлбөрийн мэдээ нь хөрөнгийн шилжүүлгийн даалгавар болдог бөгөөд хөрөнгө (төлбөр тооцоо)-ийн солилцоо нь төлбөрийн системүүд, эсхүл харилцагч банкны харилцаа холбоогоор дамжуулагдан хийгддэг.

Олон улсын ихэнх шилжүүлэг СВИФТ-ээр хийгддэг. 1973 онд долоон олон улсын банк хамтран санхүүгийн мессежийг хялбар илгээх глобал сүлжээг үүсгэх зорилгоор хамтын ажиллагааны нийгэмлэгийг байгуулсан. Энэхүү мессежийг банкнууд санхүүгийн байгууллагуудын хоорондох мөнгө гүйлгээг хийхэд солилцооны өгөгдөл болгож ашигладаг. СВИФТ -ийн төв байр нь Бельгийн Брюссель хотод байдаг.

Мөн түүнчлэн СВИФТ нь НҮБ-аас зөвшөөрөгдсөн санхүүгийн стандартыг сайжруулах болон бий болгох олон улсын стандартын байгууллага юм. Санхүүгийн байгууллага бүрд ISO 9362 код оноосон байдаг бөгөөд энэхүү кодыг Bank Identifier Code (BIC) буюу SWIFT код гэдэг. Энэхүү код нь ердийн 8 тэмдэгтийн урттай байдаг. Жишээлбэл, Deutsche Bank нь олон улсын банк бөгөөд түүний төв байр нь Германы Франкфурт хотод байдаг. Deutsche Bank- ны SWIFT код нь DEUTDEFF юм. Үүнд DEUT нь Deutsche Bank-ыг; DE нь Герман улсыг; FF нь Frankfurt хотыг тус тус илэрхийлнэ.