Ирээдүйн хугацаанд, гол телев нэг жилд Засгийн газрын олох орлого, гаргах зарлагын хэмжээг тооцож төлөвлөсөн бөгөөд парламентаар батлагдсан санхүүгийн үндсэн төлөвлөгөөг улсын төсөв гэнэ. Улсын төсөв нь орлого, зарлага гэсэн хоёр үндсэн хэсгээс бүрдэнэ.

Улсын төсвийн орлого нь урсгал орлого, хөрөнгийн орлого, тусламжийн орлогоос бүрдэнэ. Урсгал орлогын гол эх үүсвэр нь татвар юм. Татварын бус орлогод төрийн өмчийн оролцоотой аж ахуйн нэгжүүдийн төрийн өмчид ногдох Хувьцааны ногдол ашиг, түрээсийн болон хүү, торгуулийн орлого, төсөвт байгууллагын өөрийн орлого зэрэг багтана. Төсвийн зарлага нь урсгал зардал, хөрөнгийн зардал, эргэж төлөгдөх төлбөрийг хассан цэвэр зээл гэсэн үндсэн хэсгүүдээс бүрдэнэ. Урсгал зардлыг бараа, үйлчилгээний зардал, зээлийн үйлчилгээний төлбөр, татаас ба урсгал шилжүүлэг гэсэн хэсгүүдэд ангилна. Түүний нэг хэсэг нь Засгийн газраас одоогийн хэрэгцээнд зориулж янз бүрийн бараа, үйлчилгээ худалдан авах зарлага юм. Үүнийг урсгал зардал гэнэ. Засгийн газар бас тэтгэвэр, тэтгэмж, нөхөн олговор зэрэг төлбөрийг иргэдэд хийдэг бөгөөд үүнийг урсгал шилжүүлэг гэнэ. Нөгөө талаас Засгийн газар ирээдүйн хэрэглээнд зориулж хөрөнгө оруулалт хийдэг бөгөөд үүнийг хөрөнгийн зардал гэнэ. Улсын төсвийн орлого нь зарлагаасаа бага байвал уг зөрүүг улсын төсвийн алдагдал гэнэ.