Ютилити буюу ханамж гэдэг нь хийсвэр ойлголт боловч хэрэглэгчийн онолын мөн чанарыг тайлбарлахад чухал ач холбогдолтой. Энэ нь эдийн засгийн шинжлэх ухаан дахь сайн сайхан байдал, хангалуун аж байдал, хангамж, таашаал, бүр аз жаргал зэрэг ойлголтуудын ойролцоо утгатай хэрэглэгддэг.

Илүү тодорхой утгаар нь авч үзвэл, хэрэв ямар нэгэн барааг хэрэглэснээр хэрэглэгчид ямар нэгэн таашаал, ханамж үүсэхгүй л бол тэр барааг хэрэглэх нь илүүц юм. Хэрэглэгч ямар нэг бүтээгдэхүүн, үйлчилгээг худалдан авч хэрэглэхэд түүнээс тодорхой хэмжээний ханамж авдаг. Үүнээс үзэхэд, ханамж гэдэг нь тухайн барааны хүний хэрэгцээг хангах чадвар, шинж чанарыг тусгасан субьектив ойлголт юм. Ханамжийг ютиль хэмээх хийсвэр нэгжээр хэмждэг.