Хувьцаа, облигац зэрэг үнэт цаас болон бараа, валют зэргийг биржээр дамжуулж биш шууд арилждаг зах зээлийг биржийн гадуурх зах зээл гэнэ.

Жижиг, дунд зэргийн компаниуд болон биржид бүртгэгдэж чадаагүй зарим томоохон компанийн хувьцаа гол төлөв биржийн гадуурх үнэт цаасны зах зээл дээр арилжигддаг. Нийт үнэт цаасны арилжааны нэлээд хэсэг нь, зарим оронд гуравны хоёр нь уг зах дээр арилжигддаг байна. Тус зах дээрх арилжаанд оролцогч хэн нэгэн үүргээ биелүүлээгүй бол зохион байгуулагч хариуцлага хүлээдэггүй.Биржийн гадуурх зах дээр гэрээ хэлцэл хийхийн тулд арилжааны өмнө хөрөнгө төвлөрүүлэх шаардлагагүй, учир нь арилжаанд оролцогч төлбөр тооцоогоо шууд хийдэг. Тэгэхдээ гол төлөв дараа төлбөр хийх нөхцөлтэйгөөр арилжааг явуулдаг. Ийм хэлцлийг T+N1+N2 томьёоллоор хийнэ. Жишээ нь, Т+5+7 бол үнэт цаас, эсвэл барааг 5 хоногийн дараа нийлүүлнэ, төлбөрийг 7 хоногийн дараа хийнэ гэсэн үг. Биржийн гадуурх зах тодорхой газар байрладаггүй бөгөөд арилжаа гол төлөв цахим хэлбэрээр явагддаг. Уг зах нь биржийг бодвол хатуу зохицуулалтгүй учир арилжаанд оролцогчдын сонирхлыг татдаг.