Зарим компаниуд зах зээлийн хувь хэмжээгээ аль болох их байлгахыг хүсдэг. Ингэхдээ тэд борлуулалтыг өндөр дүнтэй байлгах нь нэгж зардлыг бууруулж, урт хугацаанд ашгийг өндөр байхад хөтөлнө гэж боддог. Ингээд тэд зах зээлийг үнийн мэдрэмж өндөртэй гэж үзээд үнээ хамгийн хямд тогтоодог.

Гэхдээ зах зээлийн хамгийн хямд үнийн буюу зах зээлд гүн нэвтрэх үнийн стратегийг дараах нөхцөл бүрдсэн үед ашиглавал үр дүнгээ өгнө. Үүнд:

• Зах зээл үнийн мэдрэмж өндөртэй бөгөөд үнийг доогуур тогтоосноор зах зээлээ тэлэх боломжтой байх;
• Үйлдвэрлэх хэмжээ нэмэгдэж, туршлага өссөнөөр үйлдвэрлэл ба хуваарилалтын зардал буурдаг байх;
• Хямд үнэ нь өнөөгийн болон ирээдүйн боломжтой өрсөлдөгчдийг үргээж байх зэрэг болно.

Зах зээлд нэвтрэхэд тохиолдох хаалт саад:Зах зээлд монопол ба олигопол оршиж байгаагийн нэг шалтгаан нь түүнд нэвтрэхэд тохиолдох хаалт саад юм.

• Өндөр өртөг. Үйлдвэрлэлийн тодорхой салбар, тухайн барааны зах зээлд шинээр нэвтрэн орохын тулд үйлдвэр, капиталын хэмжээ, өрсөлдөх чадвар чухал үүрэгтэй. Өөрөөр хэлбэл, тухайн зах зээлд олон жил өрсөлдөж томорчихсон, байр сууриа эзэлчихсэн компаниудтай өрсөлдөхийн тулд харьцангуй том хэмжээний капитал шаардлагатай. Тийм хэмжээний капиталыг хэн бүхэн хуримтлуулж, босгож чадахгүй тул энэ нь зах зээлд шинээр нэвтрэн ороход тохиолдох гол саад тотгор юм.
• Хуулийн хязгаарлалт. Төр засгаас зарим салбар дахь өрсөлдөөнийг хязгаарлахын тулд хуулийн хязгаарлалт тогтоодог. Үүнд патент, ороход тавих хязгаарлалтууд, гадаад худалдааны тариф, тоо хэмжээ гэх мэт аргуудыг хэрэглэнэ.

Жишээ нь шинэ төрлийн эм эсвэл тариа нээсэн компанид түүнийгээ хэдэн жилээр үйлдвэрлэж борлуулах зөвшөөрлийг Засгийг газраас өгч, уг компанийн монопол эрхийг баталгаажуулдаг. Цахилгаан, дулаан, усан хангамж, утас, кабель телевиз зэрэг үйлчилгээ явуулах эрхийг төрийн холбогдох байгууллагаас нэг хоёр эсвэл цөөн тооны компанид олгодог. Эрх авсан компаниуд хэрэглэгчдийг тодорхой үнэ тарифаар, найдвартай үйлчилгээгээр хангах үүрэг хүлээдэг. Гадаадын өрсөлдөгч компаниудаас дотоодын үйлдвэрлэгч, нийлүүлэгчдийг хамгаалахын тулд Засгийн газраас гаалийн татварыг нэмэгдүүлэх, гадаадаас оруулах бараанд тоо хязгаар тогтоох зэрэг арга хэрэглэдэг.

• Зар сурталчилгаа, барааны ялгаа. Зарим барааг хэвлэл мэдээллийн хэрэгсэл, бусад аргаар олон дахин зарлаж, сурталчилсаар байгаад олны танил болгодог. Иймд зар сурталчилгаанд зориуд их хөрөнгө мөнгө зардаг. Бусад фирм өөр бараа хийж, олны танил болсон бараатай өрсөлдүүлэхэд хэцүү, үүнд их хөрөнгө мөнгө шаардагдана.

Жишээ нь, Кока-Кола ундаа, Макдональдс түргэн хоолны газрыг дэлхийн аль ч улсад мэддэг болжээ. Түүнчлэн аль нэг барааг бусдаас ялгагдах онцлогтой болгож, хэрэглэгчдэд дасгах замаар бусад барааг зах зээлээс шахдаг. Жишээ нь, фирмийн бараа, брэнд бараа гэх мэт нь бусдын өрсөлдөх боломжийг хязгаарладаг.