Бизнесийн хөрөнгө оруулалт нь юуны өмнө үйлдвэр, завод шинээр байгуулах, машин, тоног төхөөрөмж шинээр суурилуулахад, тэдгээрийн автомат удирдлага, компьютерын хангамжийг сайжруулахад чиглэгддэг. Гэвч үндэсний баялаг зөвхөн энэ бизнесийн хөрөнгө оруулалтаас бүрддэггүй. Түүнд улсын болон хувийн бүхий л нөхөн шинэчлэгдэж байдаг капитал, газар, түүний баялгаас гадна хүмүүн капитал (боловсрол, ур чадвар, мэдлэг, туршлага, эрүүл мэнд) болон технологийн капитал багтдаг. Технологийн капиталыг их сургууль, коллеж, номын сан, судалгаа шинжилгээний болон инженерийн бааз суурь, удирдлага (менежмент) бүрдүүлнэ. Хүмүүн болон технологийн капиталыг нэмэгдүүлэх, хөгжүүлэхэд чиглэгдсэн хөрөнгө оруулалтыг бизнесийн бус хөрөнгө оруулалт гэнэ. Үүнийг бас оюуны хөрөнгө оруулалт ч гэж нэрлэдэг. Боловсрол, эрүүл мэнд зэрэг салбар дахь хөрөнгө оруулалтад Засгийн газар үлэмж үүрэгтэй байдаг. Тухайлбал, ихэнх улс оронд дунд сургуулийн зардлыг улс хариуцдаг. Мөн хүн амын эрүүл мэндийн даатгалын зарим хэсгийг Засгийн газар төлдөг. Засгийн газар боловсрол, эрүүл мэндийн салбарт өөрөө хөрөнгө оруулахын зэрэгцээ хувийн хөрөнгө оруулалт нэмэгдэж, үр ашигтай ажиллахыг дэмжиж, шаардлагатай нөхцөлийг бүрдүүлэх нь чухал ач холбогдолтой. Эдгээр салбарт оруулсан хөрөнгө оруулалт нь эргээд ДНБ-ий өсөлт, бүтээмжийн өсөлтөөр илэрдэг.