Хувьцаа ба бондыг багцаар нь худалдан авч дараа нь тэдгээрийн хувийг нийтэд худалддаг байгууллагыг хамтын сан гэнэ. Энэ сан нь борлогдох боломжтой гэж үзсэн бонд болон хувьцааг сайтар судалж худалдан авдаг. Хүмүүс хамтын сангийн хувийг худалдан авч болох бөгөөд ингэснээрээ өөрсдөө дангаараа авч чадахгүй байсан компаниудын хувьцааг эзэмших боломжтой болно.

Иймд хамтын сан нь жижиг хөрөнгө оруулагч нарт ашигтай. Хамтын сангууд янз бүрийн чиглэлээр ажилладаг. Зарим сан зөвхөн Засгийн газрын бонд худалдан авч борлуулдаг. Зарим нь өндөр технологи бүхий компаниудын хувьцаагаар мэргэшсэн байхад зарим нь үнэт металл, эсвэл өндөр эрсдэлтэй хөрөнгө оруулалтаар дагнадаг. Зарим хамтын сан хөрөнгө оруулагчаас шимтгэл авдаггүй (no-load fund), харин зарим сан шимтгэл авдаг (load fund). Янз бүрийн салбарт хөрөнгөө хувааж оруулахыг төрөлжүүлэх (diversification) гэх бөгөөд энэ нь эрсдэлийг бууруулна. Жишээ нь, хөрөнгө оруулагч хөрөнгийнхөө 30 хувийг хувьцаанд, 20 хувийг бондод, 30 хувийг үл хөдлөх хөрөнгөнд оруулж, үлдсэнийг нь банканд хийж болно. Энэхүү эрсдэлийг бууруулах аргыг багцын стратеги (portfolio strategy) гэнэ.