Олон улсын зээлийн харилцаа нь шинжлэх ухаан, технологийн ололт Нэвтэрсэн стратегийн чухал салбарт давамгайлах, түүхий эдийн эх үүсвэрийг ашиглах, ашигтай хөрөнгө оруулах, борлуулалтын зах зээлд байр сууриа бэхжүүлэх зэрэг зорилгод үйлчилдэг.

Олон улсын зээл нь дараах эерэг үүрэг гүйцэтгэнэ:

• Зээлдэгч Орны эдийн засгийг тогтворжуулах, улмаар өргөтгөхөд нөлөөлнө.
• Гадаад худалдаа, капиталын шилжилт хөдөлгөөн, улс хоорондын үйлчилгээ зэрэг эдийн засгийн гадаад харилцааг идэвхжүүлнэ.
• Зээлдүүлэгч орны компаниудын өрсөлдөх чадварыг дээшлүүлж, хөрөнгө оруулах нөхцөлийг сайжруулна.
• Олон улсын санхүүгийн зах зээлийн бусад салбарын хөгжилд түлхэц үзүүлнэ.
• Гадаад эдийн засгийн үйл ажиллагааны үр ашгийг дээшлүүлнэ.

Олон улсын зээл нь дараах сөрөг үр дагавартай:

• Зээлдэгч орны эдийн засгийн хөгжлийн тэнцвэрт байдал алдагдах эрсдэлтэй. Учир нь зээлдүүлэгчид ашигтай салбарт зээл олгоод ашиггүй салбарыг орхидог.
• Зээлдэгч орны хувьд зээлийн капиталыг хэрэглэх, зах зээл олохын төлөөх тэмцлийг хурцатгана.
• Зээлдэгч орны валютын ханшны өөрчлөлт, зээлийн хүүгийн зөрүү зэргээс илүү ашиг олох зорилготой богино хугацааны мөнгөн капиталын урсгал (hot money) нэмэгдэж, валют, санхүүгийн зах зээлийг тогтворгүй болгодог.
• Зээлдэгч орны гадаад өрийн хэмжээг нэмэгдүүлж, улмаар өрийн дарамтад оруулах эрсдэлтэй.